News

கல்வி, திறன் மேம்பாடு மற்றும் வேலைவாய்ப்பு வாய்ப்புகளை விரிவுபடுத்தும் நோக்கில் அமைந்த ஐந்து தரப்புகளைக் கொண்ட பல்தரப்பு புரிந்துணர்வு ஒப்பந்தம் (MoU) நேற்று (02) தென் கொரியாவின் Changwon Exhibition Convention Center இல் கையெழுத்திடப்பட்டது.

தொழிலாளர் அமைச்சுடன் சேர்ந்து, இலங்கையின் தேசிய தொழில்சார் பாதுகாப்பு மற்றும் சுகாதார நிறுவனம் (NIOSH Sri Lanka), Gyeongsangnam-do மாகாண அரசு, Changshin பல்கலைக்கழகம் மற்றும் Sacheon வர்த்தக மற்றும் கைத்தொழில் சபை ஆகியன இவ்வொப்பந்தத்தின் தரப்புகளாகும்.

இந்த ஒப்பந்தம், இலங்கை மாணவர்களுக்கு உயர் கல்வி, தொழிற்பயிற்சி, தொழில்துறை மனிதவள மேம்பாடு மற்றும் தென் கொரியாவில் நிரந்தர குடியேற்றம் ஆகிய துறைகளில் விசேட வாய்ப்புகளை உருவாக்கவுள்ளது.

இலங்கைத் தூதுக்குழுவிற்கு தொழிலாளர் பிரதி அமைச்சர் மகிந்த ஜயசிங்க தலைமை தாங்கினார். அவருடன் தொழிலாளர் அமைச்சின் செயலாளர் எஸ். எம். பியதிஸ்ஸ மற்றும் தேசிய தொழில்சார் பாதுகாப்பு மற்றும் சுகாதார நிறுவனத்தின் பணிப்பாளர் நாயகம் துமிந்த ஜயலத் ஆகியோரும் கலந்துகொண்டனர்.

கொரிய தரப்பை பிரதிநிதித்துவப்படுத்தி Gyeongsangnam-do கல்வி மற்றும் இளைஞர் அலுவல்கள் பணியகத்தின் பணிப்பாளர் நாயகம் கிம் சியோங்-க்யூ, Sacheon வர்த்தக மற்றும் கைத்தொழில் சபையின் தலைவர் ஹ்வாங் தே-பு மற்றும் Changshin பல்கலைக்கழகத்தின் ANCHOR திட்டக் குழுவின் பணிப்பாளர் லீ ஜே-ஹக் ஆகியோர் கலந்துகொண்டனர்.

ஏற்கனவே இலங்கைக்கும் Changshin பல்கலைக்கழகத்திற்கும் இடையில் ஏற்படுத்தப்பட்டுள்ள கல்வி ஒத்துழைப்பின் காரணமாக, இலங்கை மாணவர்கள் தென் கொரியாவில் கல்வி வாய்ப்புகளைப் பெற்றுவருகின்றனர்.

புதிய ஒப்பந்தம் அந்த வாய்ப்புகளை மேலும் வலுப்படுத்தி விரிவுபடுத்துகிறது.

இந்த ஒப்பந்தத்தில் கையெழுத்திடப்பட்டமை, கல்வி, தொழில்சார் பாதுகாப்பு, தொழிற்திறன் மேம்பாடு மற்றும் தொழில்துறை வளர்ச்சி ஆகிய துறைகளை இணைக்கும் சர்வதேச கூட்டாண்மைகளை விரிவுபடுத்துவதற்கான இலங்கையின் முயற்சிகளில் ஒரு முக்கியமான மைல்கல்லாகும்.

இந்த ஒத்துழைப்பு, எதிர்கால கூட்டுத் திட்டங்கள், நிறுவனங்களுக்கிடையிலான பரிமாற்றங்கள் மற்றும் கல்வியிலிருந்து வேலைவாய்ப்புக்கான கட்டமைக்கப்பட்ட பாதைகளை உருவாக்குவதற்கான விரிவான அடித்தளத்தை ஏற்படுத்தும் என எதிர்பார்க்கப்படுகின்றது. இது இலங்கைக்கும் கொரியா குடியரசிற்கும் பரஸ்பர நன்மைகளை வழங்கும்.

அரசாங்கம், கல்வித் துறை மற்றும் தொழில்துறையை ஒருங்கிணைக்கும் இவ்வொப்பந்தம், சர்வதேச அளவில் திறமையான மனிதவளத்தை உருவாக்குவதற்கான பகிரப்பட்ட அர்ப்பணிப்பை பிரதிபலிப்பதுடன், இரு நாடுகளுக்கும் இடையிலான நீண்டகால நட்புறவையும் மேலும் வலுப்படுத்துகிறது.